Densaýlyq saqtaý mınıstri Alekseı Soı qosymsha 2619 ókpeni jasandy jeldetý apparaty satyp alynatynyn aıtty, dep habarlaıdy Egemen.kz.
"Bizdiń mınıstrlik kúzgi kezeńge barynsha daıyndyq jumystaryn júrgizip jatyr. Eldegi aýrýhanalardaǵy tósek oryndardyń sany 54 178-ge jetedi. Bul degenimiz – qazir qoldanystaǵy 16 304 ınfeksııalyq tósek oryn, jańadan salynyp jatqan ınfeksııalyq nysandaǵy 2790 jańa tósek oryn men basqa stasıonarlardaǵy 32 064 tósek oryn. Jan saqtaý bólimindegi tósek oryndardyń sany 2981-ge jetkiziledi. 2020 jyldyń 9 qyrkúıegindegi jaǵdaı boıynsha respýblıkada 19 066 ınfeksııalyq tósek oryn bolsa, onyń 15 paıyzynda pasıentter jatyr", dedi Alekseı Soı.
Onyń aıtýynsha, qazir ınfeksııalyq jáne provızorlyq stasıonarlarda ókpeni jasandy jeldetýdiń 3379 apparaty bar. Qosymsha taǵy 2619 apparat satylyp alynǵaly jatyr. Onyń ishinde 1500 apparat otandyq kompanııalarda óndirilgen.
"2020 jyly otandyq óndiristegi 1167 dana sanıtarııalyq avtokólikti satyp alý kózdelip otyr. Olardyń bári de osy jyldyń qarasha aıyna deıin aýrýhanalarǵa jetkiziledi", dedi ol.